გელათის სამონატრო კომპლექსი შედგება მრავალი ნაგებობისგან, მათგან კედლის მხატვრობას ვხვდებით ღვთისმშობლის შობის სახელობის ტაძრის მთავარ სივრცესა და მინაშენებში, წმ. გიორგის სახელობის ტაძრის მთავარ სივრცესა და მინაშენში. ფრაგმენტულად შემორჩენილი მხატვრობა გვხვდება დავითის კარიბჭესა (სამხრეთი კარიბჭე) და წმ. ნიკოლოზის სახელობის ტაძარში.

გელათის რეაბილიტაციის კომიტეტის ერთ-ერთ მთავარ მიზანს წარმოადგენს გელათის სამონასტრო კომპლექსში შემავალი ნაგებობების კედლის მხატვრობის დაცვა და მისი კონსერვაცია.

გელათის კედლის მხატვრობის კონსერვაციის პოლიტიკა კონსერვაციის საერთაშორისოდ აღიარებულ ეთიკის პრინციპებს ეფუძნება.

ძეგლის კონსერვაციის ძირითადი პრონციპი გვავალდებულებს მხატვრობის შენარჩუნებას ამჟამინდელ მდგომარეობაში (დამატების, ცვლილების გარეშე), მის მკურნალობას და დაზიანების პროცესის მაქსიმალურ შენელებას.

ძველი და ახალი რისკების გათვალისწინებით, კედლის მხატვრობის კონსერვაციის უმთავრესი ამოცანაა კვლევასა და დიაგნოსტიკაზე დაფუძნებული გადაწყვეტილებების მიღება, რაც საკონსერვაციო ჩარევას ეფექტურს და მაქსიმალურად შედეგიანს გახდის.

საკონსერვაციო ქმედებები პრევენციული პასიური და ფიზიკური ჩარევის ჩათვლით ირჩევა ისე, რომ მინიმალური ჩარევით მიიღწეოდეს მაქსიმალური შედეგი.

საკონსერვაციო ჩარევის ძირითადი კრიტერიუმები, რომლითაც საკონსერვაციო ჯგუფი ხელმძღვანელობს შემდეგია:

• ღირებულების დაცვა და შენარჩუნება;
• ფიზიკური ისტორიის ცოდნა;
• ორიგინალი და დამატებული მასალების სრულყოფოლი ცოდნა;
• არსებული მდგომარეობის ცოდნა;
• საკონსერვაციო მასალების მოქმედების მექანიზმის ცოდნა და თავსებადობის განსაზღვრა;
• მინიმალური საკონსერვაციო ჩარევა;
• ჯანმრთელობის და უსაფრთხოების რეგულაციების დაცვა;
• სათანადო და სრულფასოვანი დოკუმენტაციის შედგენა და დაარქივება.

მსოფლიო მემკვიდრეობის კომიტეტის 44-ე სესიაზე მიღებული #44COM7B.47 გადაწყვეტილების მე-4 პუნქტისა და WHC/ICOMOS/ICCROM-ის გელათში 2022 წლის ნოემბერ-დეკემბერში განხორციელებული ერთობლივი მისიის ანგარიშის რეკომენდაციის საფუძველზე 2023 წლის აპრილიდან კედლის მხატვრობის კონსერვაციის სამუშაო ჯგუფი ჩართულია გელათის სამონასტრო კომპლექსის მონიტორინგისა და კვლევის სამუშაოებში (დეტალური ინფორმაციისთვის იხილეთ კედლის მხატვრობის გვერდზე ატვირთული ანგარიშები).

კედლის მხატვრობის მდგომარეობა, პრეზენტაცია.

2023 წლის სექტემბერში გელათის რეაბილიტაციის კომიტეტისა და ბრიტანელი მეცნიერების - ლიზა შეკედესა და სტივენ რიკერბის თანამშრომლობით, მომზადდა და კომიტეტში წარმოდგენილ იქნა გელათის ღმრთის მშობლის შობის სახელობის ტაძრის კედლის მხატვრობის საკონსერვაციო გეგმა.

გელათის ღმრთის მშობლის შობის სახელობის ტაძრის კედლის მხატვრობის საკონსერვაციო გეგმა (ორიგინალი დოკუმენტი)