გელათის სამონასტრო კომპლექსში, მთავარი ტაძრის ერთიანი/დროებითი გადახურვის სამუშაოები  ფართომასშტაბიან და ძალზედ საპასუხისმგებლო ფაზაში გადადის. ტაძრის პერიმეტრზე უკვე განთავსდა რკინაბეტონის ფილები, რომლებიც დროებითი გადახურვის კონსტრუქციისათვის ფუნდამენტის ფუნქციას შეასრულებენ, ხოლო  გერმანული კომპანიის „ლეიერის“  მიერ უშუალოდ გელათის მთავარი ტაძრის ერთიანი გადახურვისთვისთვის დამზადებული მეტალის კონსტრუქციები ორიოდ დღეში ადგილზე იქნება. კონსტრუქციის აგების სამუშაოებს, ასევე, სათანადო გამოცდილების მქონე გერმანული კომპანია „ქუადრექსი“ ასრულებს.

ზემოხსენებულ უმნიშვნელოვანეს სამუშაოებთან დაკავშირებით, გერმანელი სპეციალისტების  მოთხოვნით, მიმდინარე წლის 2 ივლისიდან 15 აგვისტომდე, გელათის სამონასტრო კომპლექსის ტერიტორიაზე შრომითი უსაფრთხოების სპეციალური რეჟიმი წესდება, რაც მომლოცველებისა და სტუმრებისათვის, მათივე უსაფრთხოების საუკეთესო ინტერესების გათვალისწინებით, ტერიტორიის ზემოაღნიშნული ვადით დახურვას გულისხმობს.

გელათის რეაბილიტაციის კომიტეტი სრულად თანაუგრძნობს სტუმრებისა და მომლოცველების სურვილს მოილოცონ და მოინახულონ გელათის სამონასტრო კომპლექსი და იმედოვნებს, რომ საზოგადოება გაგებით მოეკიდება აღნიშნულ ფაქტს.

ოფიციალური წერილი გერმანული კომპანიის მხრიდან მონასტრის 6 კვირიანი ვადით დახურვის საჭიროებაზე